مضمون کی طرف جائیں

Chidya Chade ki Kahani چڑیا چڑے کی کہانی از مولانا ابوالکلام آزاد

نوٹ- اس متن میں بعض اشعار حذف کر دیئے گیے ہیں کیوں کہ یہ متن بنیادی طور پر مغربی بنگال کی بارہویں جماعت کے نصاب کو ملحوظ رکھتے ہوئے بنایا گیا ہے۔          

خط نمبر -۱۹

خط نمبر -۱۹ از مولانا ابوالکلام آزاد

قلعۂ احمد نگر         

17مارچ 1943ء

صدیق ِمکرم

زندگی میں بہت سی کہانیاں بنائیں۔ خود زندگی ایسی گزری جیسے ایک کہانی ہو:

ہے آج جو سرگُز َشت اپنی
کل اس کی کہانیاں بنیں گی

سرگُز َشت (زندگی کی کہانی)

آئیے آج آپ کو چڑیا چڑے کی کہانی سناؤں:

یہاں کمرے جو ہمیں رہنے کو ملے ہیں، پچھلی صدی کی تعمیرات(عمارت بنانے کا عمل) کا نمونہ ہیں۔ چھت لکڑی کے شہتیروں(چَوکور  لمبی لکڑی) کی ہے اور شہتیروں کے سہارے کے لیے محرابیں (طاق یا کمان کی شکل کی جگہ جو دیوار میں بنائی جاتی ہے)ڈال دی ہیں نتیجہ یہ ہے کہ جا بجا گھونسلہ بنانے کے قدرتی گوشے (جگہ)نکل آئے اور گوریّاؤں (ایک قسم کا پرندہ)کی بستیاں آباد ہو گئیں۔ دن بھر ان کا ہنگامۂ تگ و دَو(شور) گرم رہتا ہے۔ کلکتہ میں بالی گنج کا علاقہ چونکہ کھلا اور درختوں سے بھرا ہوا ہے اس لیے وہاں بھی مکانوں کے برآمدوں اور کارنسوں (چھت کا باہری حصہ)پر چڑوں کے غول(جھنڈ) ہمیشہ حملہ کرتے رہتے ہیں۔ یہاں کی ویرانی دیکھ کر گھر کی ویرانی یاد آ گئی:

اُگ رہا ہے در و دیوار سے سبزہ غالب 
ہم بیاباں میں ہیں اور گھر میں بہار آئی ہے!  

بیاباں-ویران جگہ مثلاً ریگستان

گزشتہ سال جب اگست میں یہاں ہم آئے تھے تو ان چڑیوں کی آشیاں سازیوں(گھر بنانے کا عمل) نے بہت پریشاں کر دیا تھا۔

کمرہ کے مشرقی گوشہ میں منہ دھونے کی ٹیبل لگی ہے۔ ٹھیک اِس کے اوپر نہیں معلوم کب سے ایک پرانا گھونسلہ تعمیر پا چکا تھا۔ دن بھر میدان سے تنکے چُن چُن کر لاتیں اور گھونسلے میں بچھانا چاہتیں۔ وہ ٹیبل پر گر کے اسے کوڑے کَرکَٹ سے اَٹ(بھر) دیتے۔ اِدھر جگ بھروا کے رکھا، اُدھر تنکوں کی بارش شروع ہو گئی۔ پچھم کی طرف چارپائی دیوار سے لگی تھی۔ اِس کے اوپر نئی تعمیروں کی سرگرمیاں جاری تھیں۔ اِن نئی تعمیروں کا ہنگامہ اور زیادہ عاجز کر دینے والا تھا۔ ان چڑیوں کو ذرا سی تو چونچ ملی ہے اور مٹھی بھر کا بدن نہیں، لیکن طلب و سعی(کسی چیز کو حاصل کرنے کا جستجو) کا جوش اِس بلا کا پایا ہے کہ چند منٹوں کے اندر بالشت (ہاتھ کی انگلیوں کو پوری طرح پھیلانے کے بعد چھنگلیا کے کنارے سے انگوٹھے کے کنارے تک یعنی  تقریباً دو مٹھی کا فاصلہ  ) بھر کلفات(مٹی) کھود کے صاف کر دیں گی۔ حکیم ارشمیدس (Archimedes) کا مقولہ مشہور ہے:

Dos Mol Pau Sto Kai Ten Gen Kineso

”مجھے فضا میں کھڑے ہونے کی جگہ دے دو، میں کرۂ ارضی کو اس کی جگہ سے ہٹا دوں گا۔“اس دعوے کی تصدیق اِن چڑیوں کی سرگرمیاں دیکھ کر ہو جاتی ہے۔ پہلے دیوار پر چونچ مار مار کر اتنی جگہ بنا لیں گی کہ پنجے ٹیکنے کا سہارا نکل آئے۔ پھر اس پر پنجے جما کر چونچ کا پھاوڑا (ایک قسم کا ہتھیار جو زمین کھودنے کے کام آتا ہے)چلانا شروع کر دیں گی، اور اِس زور سے چلائیں گی کہ سارا جسم سُکڑ سُکڑ(بدن کا سمٹنا) کر کانپنے لگے گا اور پھر تھوڑی دیر بعد دیکھیے تو کئی انچ کلفات اُڑ چکی ہوگی۔ مکان چونکہ پرانا ہے، اِس لیے نہیں معلوم کتنی مرتبہ چونے اور ریت کی تہیں دیوار پر چڑھتی رہی ہیں۔ اب مل ملا کر تعمیری مسالہ کا ایک موٹا سا دَل (تہہ)بن گیا ہے۔ ٹوٹتا ہے تو سارے کمرے میں گرد کا دھواں پھیل جاتا ہے، اور کپڑوں کو دیکھیے تو غبار(دھول) کی تہیں جم گئی ہیں۔ اِس مصیبت کا علاج بہت سَہَل (آسان)تھا یعنی مکان کی ازسَرِ نَو(دوبارہ) مرمت کر دی جائے اور تمام گھونسلے بند کر دیے جائیں۔ لیکن مرمت بغیر اس کے ممکن نہ تھی کہ معمار(مستری) بلائے جائیں، اور یہاں باہر کا کوئی آدمی اندر قدم رکھ نہیں سکتا۔ یہاں ہمارے آتے ہی پانی کے نل بِگڑ گئے تھے۔ ایک معمولی مستری کا کام تھا، لیکن جب تک ایک انگریزی فوجی انجینئر کمانڈنگ آفیسر پروانۂ راہداری(اجازت نامہ) لے کر نہیں آیا، ان کی مرمت نہ ہو سکی۔

چند دنوں تک تو میں نے صبر کیا، لیکن پھر برداشت نے صاف جواب دے دیا

اور فیصلہ کرنا پڑا کہ اب لڑائی کے بغیر چارہ نہیں۔یہاں میرے سامان میں ایک چھتری بھی آ گئی ہے۔ میں نے اٹھائی اور اعلانِ جنگ کر دیا۔ لیکن تھوڑی ہی دیر کے بعد معلوم ہو گیا کہ اس کوتاہ دستی(چھوٹے ہاتھ) کے ساتھ اِن حریفانِ سقف و محراب(حریف – دشمن، سقف- چھت، محراب-طاق ،  مطلب  ہےپرندے) کا مقابلہ ممکن نہیں۔ حیران ہو کر کبھی چھتری کی نارَسائی(نہ پہنچنے کی حالت) دیکھتا، کبھی حریفوں کی بلند آشیانی(اونچائی)۔ بے اختیار حافظ کا شعر یاد آ گیا:

خیالِ قدِّ بلند تو می کند دلِ من
تو دستِ کوتہ من بین و آستین دراز

اب کسی دوسرے ہتھیار کی تلاش شروع ہوئی۔ برآمدہ (گھر کے باہر بیٹھنے کا حصہ)میں جالا صاف کرنے کا بانس پڑا تھا۔ دوڑتا ہوا گیا اور اُسے اٹھا لایا۔ اب کچھ نہ پوچھئے کہ میدانِ کارزار(لڑائی) میں کِس زور کا رن(لڑائی) پڑا۔ کمرہ میں چاروں طرف حریف طَواف(چکر) کر رہا تھا اور میں بانس اُٹھائے دیوانہ وار اس کے پیچھے دَوڑ رہا تھا۔ فردوسی اور نظامی کے رجز (فخریہ جملے)بے اختیار نکل رہے تھے:

بہ خنجر زمین را مَیستان کنم
بہ نیزہ ہوا را نَیستان کنم

آخر میدان اپنے ہی ہاتھ رہا، اور تھوڑی دیر کے بعد کمرہ اِن حریفان سقف و محراب(گوریاؤں) سے بالکل صاف تھا۔اب میں نے چھت کے تمام گوشوں پر فتح مندانہ نظر(جیت کی خوشی والی نظر) ڈالی۔ اور مطمئن ہو کر لکھنے میں مشغول(کام میں) ہو گیا۔ لیکن ابھی پندرہ منٹ بھی پورے نہیں گزرے ہوں گے کہ کیا سُنتا ہُوں۔ حریفوں کی رجز خوانیوں اور ہوا پیمائیوں(پنکھ سے ہوا کی آواز کا نکلنا) کی آوازیں پھر اُٹھ رہی ہیں۔ سر اٹھا کے جو دیکھا تو چھت کا ہر گوشہ ان کے قبضہ میں تھا میں فوراً اُٹھا اور بانس لا کر پھر معرکۂ کارزار(لڑائی) گرم کر دیا۔ اِس مرتبہ حریفوں نے بڑی پامردی(ہمت) دکھائی۔ ایک گوشہ چھوڑنے پر مجبور ہوتے تو دُوسرے میں ڈٹ جاتے لیکن بالآخر میدان کو پیٹھ دکھانی (چھوڑنا)ہی پڑی۔ کمرے سے بھاگ کر برآمدہ میں آئے اور وہاں اپنا لاؤ لشکر (لڑائی کے سامان)نئے سرے سے جمانے لگے۔ میں نے وہاں بھی تعاقب کیا، اور اس وقت تک ہتھیار ہاتھ سے نہیں رکھا کہ سرحد سے بُہت دُور تک میدان صاف نہیں ہو گیا تھا۔اب دشمن کی فوج تِتّر بِتّر ہو گئی تھی مگر یہ اندیشہ باقی تھا کہ کہیں پھر اکٹھی ہو کر میدان کا رُخ نہ کرے۔ تجربے سے معلوم ہوا تھا کہ بانس کے نیزہ(ہتھیار) کی ہیبت(ڈر) دشمنوں پر خُوب چھا گئی ہے۔ جس طرح رُخ کرتا تھا، اُسے دیکھتے ہی کلمۂ فرار پڑھتے تھے۔ اس لیے فیصلہ کیا کہ ابھی کچھ عرصہ تک اسے کمرہ ہی میں رہنے دیا جائے۔ اگر کسی اِکا دُکا نے رُخ کرنے کی جُرات بھی کی تو یہ سربفلک نیزہ(بانس) دیکھ کر الٹے پاؤں بھاگنے پر مجبور ہو جائے گا۔ چنانچہ ایسا ہی کیا گیا۔ سب سے پُرانا گھونسلہ مُنہ دھونے کی ٹیبل کے اوپر تھا۔ بانس اس طرح وہاں کھڑا کر دیا گیا کہ اس کا سِرا (اوپری حصہ)ٹھیک ٹھیک گھونسلے کے دروازے کے پاس پہنچ گیا تھا۔ اب گو مستقبل(آنے والا وقت) اندیشوں سے خالی نہ تھا تاہم طبیعت مطمئن تھی کہ اپنی طرف سے سر و سامانِ جنگ میں کوئی کمی نہیں کی گئی۔ میرؔ کا یہ شعر زبانوں پر چڑھ کہ بُہت پامال(ذلیل ) ہو چکا ہے تاہم موقعہ کا تقاضا ٹالا بھی نہیں جا سکتا۔

شکست و فتح نصیبوں سے ہے ولے اے میرؔ
مقابلہ تو دلِ ناتواں نے خوب کیا

اب گیارہ بج رہے تھے۔ میں کھانے کے لیے چلا گیا۔

تھوڑی دیر کے بعد واپس آیا تو کمرہ میں قدم رکھتے ہی ٹِھٹک(حیران) کے رہ گیا۔ کیا دیکھتا ہوں کہ سارا کمرہ پھر حریف کے قبضہ میں ہے اور اس اطمینان و فراغت(سکون) سے اپنے کاموں میں مشغول ہیں، جیسے کوئی حادثہ پیش آیا ہی نہیں۔ سب سے بڑھ کر یہ کہ جس ہتھیار کی ہیبت پر اس درجہ بھروسہ کیا گیا تھا، وہی حریفوں کی کامجوئیوں(مقصد حاصل کرنے) کا ایک نیا آلہ (ہتھیار)ثابت ہوا۔ بانس کا سِرا جو گھونسلے سے بالکل لگا ہوا تھا،گھونسلے میں جانے کے لیے اب دہلیز کا کام دینے لگا ہے۔ تنکے چُن چُن کر لاتے ہیں،اور ان نَو تعمیر(نیا بنا ہوا) دہلیز پر بیٹھ کر بہ اطمینان تمام گھونسلے بچھاتے ہیں۔ ساتھ ہی چُوں چُوں بھی کرتے جاتے ہیں۔ عجیب نہیں یہ مصرعہ گنگنا رہے ہوں کہ:

عُدو شود سببِ خیر گر خُدا خواہد

اپنی وہمی فتح مندیوں(وہ جیت جو حقیقت نہ ہو) کا یہ حسرت انگیز(افسوس ناک) انجام دیکھ کر بے اختیار ہمت نے جواب دیدیا۔ صاف نظر آ گیا کہ چند لمحوں کے لیے حریف کو عاجز کر دینا آسان ہے مگر اُن کے جوشِ اِستِقامت( طاقت)کا مقابلہ کرنا آسان نہیں، اور اب اس میدان میں ہار مان لینے کے سوا کوئی چارۂ کار نہیں رہا۔اب یہ فکر ہوئی کہ ایسی رسم و راہ(طریقہ) اِختیار کرنی چاہیے کہ ان ناخواندہ مہمانوں (بن بلائے مہمان)کے ساتھ ایک گھر میں گزارہ ہو سکے۔ سب سے پہلے چارپائی کا معاملہ سامنے آیا۔ یہ بالکل نئی تعمیرات کی زد (سامنے)میں تھی۔ پرانی عمارت کے گرنے اور نئی تعمیروں کے سر و سامان سے جس قدر گرد و غبار اور کوڑا کرکٹ نکلتا۔ سب کا سب اسی پر گرا۔ اس لیے اسے دیوار سے اتنا ہٹا دیا گیا کہ براہِ راست(سیدھا) زد میں نہ رہے۔ اِس تبدیلی سے کمرہ کی شکل ضرور بگڑ گئی، لیکن اب اس کا علاج ہی کیا تھا؟ جب خود اپنا گھر ہی اپنے قبضہ میں نہ رہا تو پھر شکل و ترتیب کی آرائشوں(سجاوٹ) کی کسے فکر ہو سکتی تھی؟ البتہ مُنہ دھونے کے ٹیبل کا معاملہ اتنا آسان نہ تھا۔ وہ جس گوشے میں رکھا گیا تھا، صرف وہی جگہ اس کے لیے نکل سکتی تھی، ذرا بھی ادھر ادھر کرنے کی گنجائش نہ تھی۔ مجبوراس یہ انتظام کرنا پڑا کہ بازار سے بہت سے جھاڑن منگوا کر رکھ لیے اور ٹیبل کی ہر چیز پر ایک ایک جھاڑن(صافی یعنی صاف کرنے کا کپڑا ) ڈال دیا۔ تھوڑی تھوڑی دیر کے بعد انہیں اٹھا کر جھاڑ دیتا اور پھر ڈال دیتا۔ ایک زیادہ مشکل مسئلہ فرش کی صفائی کا تھا۔ لیکن اُسے بھی کسی نہ کسی طرح حل کیا گیا۔ یہ بات طے کر لی گئی کہ صبح کی معمولی صفائی کے علاوہ بھی کمرے میں بار بار جھاڑو پھر جانا چاہیے ایک نیا جھاڑو منگوا کر الماری کی آڑ میں چھُپا دیا۔ کبھی دن میں دو مرتبہ، کبھی تین مرتبہ کبھی اس سے بھی زیادہ اس سے کام لینے کی ضرورت پیش آتی۔ یہاں ہر دو کمرے کے پیچھے ایک قیدی صفائی کے لیے دیا گیا ہے۔ ظاہر ہے کہ وہ ہر وقت جھاڑو لیے کھڑا نہیں رہ سکتا۔ اور اگر رہ بھی سکتا تو اس پر اتنا بوجھ ڈالنا انصاف کے خلاف تھا۔ اس لیے یہ طریقہ اختیار کرنا پڑا کہ خود ہی جھاڑو اٹھا لیا، اور ہم سایوں کی نظریں بچا کے جلد جلد دو چار ہاتھ مار دیے۔ دیکھیے ان ناخواندہ مہمانوں کی خاطر تواضع(مہمان نوازی) میں کنّاسی(جھاڑو پوچھا) تک کرنی پڑی۔

ایک دن خیال ہوا کہ جب صلح(سمجھوتا) ہو گئی تو چاہیے کہ پوری طرح صلح ہو۔

یہ ٹھیک نہیں کہ رہیں ایک ہی گھر میں، اور رہیں بیگانوں کی طرح۔ میں نے باورچی خانے سے تھوڑا سا کچا چاول منگوایا، اور جس صوفے پر بیٹھا کرتا ہوں، اس کے سامنے کی دری پر چند دانے چِھٹک دیے۔ پھر اس طرح سنبھل کے بیٹھ گیا، جیسے شکاری دام (جال)بچھا کے بیٹھ جاتا ہے۔کچھ دیر تک تو مہمانوں کی توجہُ نہیں ہوئی۔ اور اگر ہوئی بھی تو ایک غلط اندازِ نظر سے معاملہ آگے نہیں بڑھا۔ لیکن پھر صاف نظر آ گیا کہ معشوقانِ ستم پیشہ(ظلم کرنے والے محبوب) کے تغافل(جان بوجھ کر انجان بننا) کی طرح یہ تغافل بھی نظر بازی (چوری چھپے دیکھنا)کا ایک پردہ ہے۔ ورنہ نیلے رنگ کی دری پر سفید سفید ابھرے ہوئے دانوں کی کشش ایسی نہیں کہ کام نہ کر جائے۔ پہلے ایک چڑیا آئی اور ادھر ادھر کودنے لگی۔ بظاہر چہچہانے میں مشغول تھی مگر نظر دانوں پر تھی۔ پھر دوسری آئی اور پہلی کے ساتھ مل کر دری کا طواف کرنے لگی۔ پھر تیسری اور چوتھی بھی پہنچ گئی۔ کبھی دانوں پر نظر پڑتی، کبھی دانہ ڈالنے والے پر۔ کبھی ایسا معلوم ہوتا کہ جیسے آپس میں کچھ مشورہ ہو رہا ہے۔ کبھی معلوم ہوتا ہر فرد غور و فکر میں ڈوبا ہوا ہے۔ آپ نے غور کیا ہوگا کہ گوریّا جب تفتیش اور تَفَحُص کی نگاہوں(چھان بین ) سے دیکھتی ہے تو اس کے چہرے کا کچھ عجیب سنجیدہ انداز ہو جاتا ہے۔ پہلے گردن اٹھا کر سامنے کی طرف دیکھے گی۔ پھر گردن موڑ کے داہنے بائیں دیکھنے لگے گی۔ پھر کبھی گردن کو مروڑ دے کر اوپر کی طرف نظر اٹھائے گی اور چہرے پر تفحص و اِستِفہام (چھان بین اور سوال)کا کچھ ایسا انداز چھا جائے گا، جیسے ایک آدمی ہر طرف مُتَعَجُبانہ نگاہ(حیرت بھری نگاہ) ڈال ڈال کر اپنے آپ سے کہہ رہا ہو کہ آخر یہ معاملہ ہے کیا؟ اور ہو کیا رہا ہے؟ ایسی مُتَفَحُص نگاہیں(جستجو والی نگاہ) اس وقت بھی ہر چہرہ پر ابھر رہی تھیں۔پھر کچھ دیر کے بعد آہستہ آہستہ قدم بڑھنے لگے۔ لیکن براہِ راست دانوں کی طرف نہیں۔ آڑے ترچھے ہو کر بڑھتے اور کترا کر نکل جاتے۔ گویا یہ بات دکھائی جا رہی تھی کہ خدانخواستہ ہم دانوں کی طرف نہیں بڑھ رہےہیں۔ آپ جانتے ہیں کہ صَید(قیدی) سے کہیں زیادہ صیاد (قید کرنے والا)کو اپنی نگرانیاں کرنی پڑتی ہیں، جونہی ان کے قدموں کا رخ دانوں کی طرف پھِرا، میں نے دم سادھ لیا، نگاہیں دُوسری طرف کر لیں، اور سارا جسم پتھر کی طرح بے حِس و حرکت(شانت) بنا لیا۔ گویا آدمی کی جگہ پتھر کی ایک مورتی دھری ہے۔ کیونکہ جانتا تھا، اگر نگاہِ شوق (آرزو سے بھری نظر)نے مُضطَرِب (بے قرار)ہو کر ذرا بھی جلد بازی کی، تو شکار دام(جال) کے پاس آتے آتے نکل جائے گا۔ یہ گویا نازِ حسن (خوبصورتی کا غرور)اور نیازِ عشق(محبت کی عاجزی) کے معاملات کا پہلا مرحلہ تھا۔ خیر خدا خدا کر کے اس عِشوۂ تغافل نُما(ایسی دل کش ادا جس میں بے خبری بھی ہو) کے ابتدائی مرحلے طے ہوئے، اور ایک بُتِ طنَّاز (نخرے والا محبوب ، مراد گوریا)نے صاف صاف دانوں کی طرف رُخ کیا۔ مگر یہ رُخ تھا۔ ہزار تغافل اِس کے جِلَو میں(ساتھ ساتھ) چل رہے تھے۔ ایک قدم آگے بڑھتا تھا تو دو قدم پیچھے ہٹتے تھے۔ میں جی ہی جی میں کہہ رہا تھا کہ التفات و تغافل(مہربانی اور بے رخی) کا یہ ملا جلا انداز بھی کیا خوب انداز ہے۔ کاش تھوڑی سی تبدیلی اس میں کی جا سکتی۔ دو قدم آگے بڑھتے۔ ایک قدم پیچھے ہٹتا۔ غالبؔ بھی کیا خوب کہہ گیا ہے:

وداع و وصل جدا گانہ لذتے دارد
ہزار بار بِرَد، صد ہزار بار بیا

التفات و تغافل کی اِن عشوہ گریوں(دل کش ادائیں) کی ابھی جلوہ فروشی(مظاہرہ) ہو ہی رہی تھی کہ ناگہاں ایک تَنومند(تندرست) چڑے نے جو اپنی قلندرانہ بے دماغی(قلندروں جیسی بے فکری) اور رندانہ جراتوں(بِنا ڈرے بات کہنے کی طاقت) کے لحاظ سے پورے حلقہ میں ممتاز(مشہور) تھا، سلسلۂ کار کی درازی سے اُکتا کر بے باکانہ اقدام اٹھا دیا۔ اور زبانِ حال(ظاہری صورت  جس سے حالت ظاہر ہو) سے یہ نعرۂ مستانہ(بے خودی والی آواز) لگاتا ہوا، بہ یک دفعہ دانوں پر ٹوٹ پڑا ۔ اِس ایک قدم کا اٹھنا تھا کہ معلوم ہوا، جیسے اچانک تمام رُکے ہوئے قدموں کے بندھن کھل پڑے۔ اب نہ کسی قدم میں جھجک تھی، نہ کسی نگاہ میں تذَبذُب(ہچکچاہٹ)، مجمع کا مجمع بہ یک دفعہ دانوں پر ٹوٹ پڑا۔ اور اگر انگریزی محاورہ کی تعبیر    (مطلب) مُستَعار(ادھار) لی جائے تو کہا جا سکتا ہے کہ حجاب و تامل(شرم و جھجھک) کی ساری برف اچانک ٹوٹ گئی،یا یوں کہیے کہ پگھل گئی۔ غور کیجئے، تو اس کارگاہِ عمل(دنیا) کے ہر گوشہ کی قدم رانیاں (چلنے کا عمل)ہمیشہ اسی ایک قدم کے انتظار میں رہا کرتی ہیں۔ جب تک یہ نہیں اٹھتا۔ سارے قدم زمین میں گڑے رہتے ہیں۔ یہ اُٹھا اور گویا ساری دنیا اچانک اٹھ گئی۔اِس بزمِ سُود و زیاں(دنیا) میں کامرانی (کامیابی)کا جام(شراب کا پیالہ) کبھی کوتاہ دستوں کے لیے نہیں بھرا گیا وہ ہمیشہ انہی کے حصے میں آیا جو خود بڑھ کر اٹھا لینے کی جرات رکھتے تھے۔ شاد عظیم آبادی مرحوم نے ایک شعر کیا خوب کہا تھا:

یہ بزمِ مے ہے، یاں کوتاہ دستی میں ہے محرومی
جو بڑھ کر خود اٹھا لے ہاتھ میں، مینا اُسی کا ہے

اِس چڑے کا یہ بے باکانہ اقدام(نِڈر) کچھ ایسا دل پسند واقع ہوا

کہ اُسی وقت دل نے ٹھان لی، اِس مرد کار (با صلاحیت)سے رسم و راہ(تعلقات) بڑھانی چاہیے۔ میں نے اس کا نام قلندر رکھ دیا۔ کیونکہ بے دماغی اور وارفتگی (بے خودی)کی سرگرانیوں(غصہ) کے ساتھ ایک خاص طرح کا بانکپن(دلیری) بھی ملا ہوا تھا۔ اور اس کی وضعِ قلندرانہ(قلندر کی طرح ) کو آب و تاب(چمک) دے رہا تھا:

رہے اِک بانکپن بھی بے دماغی میں تو زیبا ہے
بڑھا دو چینِ ابرو پر ادائے کج کلاہی کو

دو تین دن تک اسی طرح ان کی خاطر تواضُع (مہمان نوازی)ہوتی رہی۔ دِن میں دو تین مرتبہ دانے دری پر ڈال دیتا۔ ایک ایک کر کے آتے، اور ایک ایک دانہ چن لیتے کبھی دانہ ڈالنے میں دیر ہو جاتی تو قلندر آ کر چوں چوں کرنا شروع کر دیتا کہ وقتِ معہود(مقرر وقت) گزر رہا ہے۔ اس صورت حال نے اب اطمینان دلا دیا تھا کہ پردۂ حجاب اٹھ چکا۔ وہ وقت دور نہیں کہ رہی سہی جھجک بھی نکل جائے گی۔ع

اور کھل جائیں گے دو چار ملاقاتوں میں!

چند دنوں کے بعد میں نے اس معاملہ کا دوسرا قدم اٹھایا۔ سگرٹ کے خالی ٹین کا ایک ڈھکنا لیا۔ اِس میں چاول کے دانے ڈالے، اور ڈھکنا دری کے کنارے رکھ دیا۔ فوراً مہمانوں کی نظر پڑی۔ کوئی ڈھکنے کے پاس آ کر منہ مارنے لگا۔ کوئی ڈھکنے کے کنارے پر چڑھ کر زیادہ جمعیتِ خاطر(اطمینان) کے ساتھ چگنے میں مشغول ہو گیا۔ آپس میں رقیبانہ ردّ و کد (لڑائی)بھی ہوتی رہی۔ جب دیکھا کہ اس طریقِ ضیافت(مہمان نوازی کا انداز) سے طبیعتیں آشنا (واقف)ہو گئی ہیں تو دوسرے دن ڈھکنا دری کے کنارےسے سے کچھ ہٹا کر رکھا۔ تیسرے دن اور زیادہ ہٹا دیا۔ اور بالکل اپنے سامنے رکھ دیا۔ گویا اس طرح بتدریج بُعد(آہستہ آہستہ دوری) سے قُرب(نزدیک) کی طرف معاملہ بڑھ رہا تھا۔ اتنا قریب دیکھ کر پہلے تو مہمانوں کو کچھ تاَمُل(ہچکچا ہٹ) ہوا ۔ دری کے پاس آ گئے مگر قدموں میں جھجک تھی اور نگاہوں میں تذبذب بول رہا تھا۔ لیکن اتنے میں قلندر اپنے قلندرانہ نعرے لگاتا ہوا آ پہنچا، اور اس کی رندانہ جرأتیں دیکھ کر سب کی جھجک دور ہو گئی۔ گویا اِس راہ میں سب قلندر ہی کے پیرو (ماننے والا)ہوئے۔ جہاں اس کا قدم اٹھا، سب کے اٹھ گئے، وہ دانوں پر چونچ مارتا، پھر سر اٹھا کے اور سینہ تان کے زبانِ حال(ظاہری صورت  جس سے حالت ظاہر ہو) سے مترنم ہوتا۔جب معاملہ یہاں تک پہنچ گیا، تو پھر ایک قدم اور اُٹھایا گیا اور دانوں کا برتن دری سے اٹھا کے تپائی (تین پیر والا ٹیبل)پر رکھ دیا۔ یہ تپائی میرے بائیں جانب صوفے لگی رہتی ہے اور پوری طرح میرے ہاتھ کی زد میں ہے۔ اس تبدیلی سے خوگر (عادی)ہونے میں کچھ دیر لگی، بار بار آتے اور تپائی کا چکر لگا کر چلے جاتے۔ بالآخر یہاں بھی قلندر ہی کو پہلا قدم بڑھانا پڑا اور اس کا بڑھنا تھا کہ یہ منزل بھی پچھلی منزل کی طرح سب پر کھل گئی۔ اب تپائی کبھی تو ان کی مجلس آرائیوں (محفل سجانا)کا ایوانِ طرب(خوشی کی جگہ) بنتی اور کبھی باہمی معرکہ آرائیوں(آپسی لڑائی) کا اکھاڑا۔ جب اس قدر نزدیک آ جانے کے خوگر ہو گئے تو میں نے خیال کیا، اب معاملہ کچھ اور آگے بڑھایا جا سکتا ہے۔ ایک دن صبح یہ کیا کہ چاول کا برتن صوفے پر ٹھیک اپنی بغل میں رکھ دیا اور پھر لکھنے میں اس طرح مشغول ہو گیا کہ گویا اس معاملے سے کوئی سر و کار نہیں۔ تھوڑی دیر کے بعد کیا سنتا ہوں کہ زور زور سے چونچ مارنے کی آواز آ رہی ہے۔ کنکھیوں سے دیکھا تو معلوم ہوا کہ ہمارا پرانا دوست قلندر پہنچ گیاہے اور بے تکان(لگاتار) چونچ مار رہا ہے۔ ڈھکنا چونکہ بالکل پاس دھرا تھا، اس لیے اس کی دُم میرے گھٹنے کو چھو رہی تھی۔ تھوڑی دیر کے بعد دوسرے یارانِ تیز گام(گوریا) بھی پہنچ گئےاور پھر تو یہ حال ہو گیا کہ ہر وقت دو تین دوستوں کا حلقہ بے تکلف میری بغل میں اچھل کود کرتا رہتا۔ کبھی کوئی صوفے کی پشت(پچھلا حصہ) پر چڑھ جاتا، کبھی کوئی جَست لگا کر(کود کر) کتابوں پر کھڑا ہو جاتا، کبھی نیچے اُتر آتا اور چوں چوں کر کے واپس آ جاتا۔ بے تکلفی کی اس اچھل کود میں کئی مرتبہ ایسا بھی ہوا کہ میرے کاندھے کو درخت کی ایک جھکی ہوئی شاخ سمجھ کر اپنی جست و خیز (اچھل کود)کا نشانہ بنانا چاہا، لیکن پھر چونک کر پلٹ گئے، یا پنجوں سے اسے چھوا اور اوپر ہی اوپر نکل گئے۔ گویا ابھی معاملہ اس منزل سے آگے نہیں بڑھا تھا۔ بہرحال رفتہ رفتہ ان آہوانِ ہوائی(گوریا) کو یقین ہو گیا کہ یہ صورت ہمیشہ صوفے پر دکھائی دیتی ہے، آدمی ہونے پر بھی آدمیوں کی طرح خطرناک نہیں ہے۔ دیکھیے محبت کا افسوں(جادو) جو انسانوں کو رام (اپنا)نہیں کر سکتا، وحشی پرندوں کو رام کر لیتا ہے۔ بار ہا ایسا ہوا کہ میں اپنے خیالات میں محو(کھویا ہوا)، لکھنے میں مشغول ہوں؛ اتنے میں کوئی دلنشیں بات نوکِ قلم پر آ گئی یا عبارت کی مناسبت نے اچانک کوئی پُر کیف شعر یاد دلا دیا، اور بے اختیار اس کی کیفیت کی خود رفتگی میں میرا سر و شانہ(سر اور کاندھا) ہلنے لگا، یا منہ سے "ہا” نکل گیا، اور یکایک زور سے پروں کے اڑنے کی ایک پھر سی آواز سنائی دی۔ اب جو دیکھتا ہوں تو معلوم ہوا کہ ان یارانِ بے تکلف کا ایک طائفہ (جھنڈ)میری بغل میں بیٹھا بے تامل اپنی اچھل کود میں مشغول تھا۔ اچانک انہوں نے دیکھا کہ یہ پتھر اب ہلنے لگا ہے، تو گھبرا کر اڑ گئے۔ عجب نہیں، اپنے جی میں کہتے ہوں، یہاں صوفے پر ایک پتھر پڑا رہتا ہے، لیکن کبھی کبھی آدمی بن جاتا ہے!

آپ ہمیں سوشل میڈیا پر بھی فالو کر سکتے ہیں

Safar Dinajpuri

معیاری اردو کے مصنف اور محقق، ادب، شاعری اور تعلیمی موضوعات پر متواتر لکھتے ہیں۔

۳ تبصرے

اپنی قیمتی رائے کا اظہار کریں

آپ کا ای میل پتہ شائع نہیں کیا جائے گا۔ ضروری خانوں پر (*) کا نشان ہے۔